پێکەوە بۆ بینینی فیلم: مردن وەک ویستراو و ژیان وەک نەویستراو

نەشئە ئازاد

مردن هەمیشە ئەو پرسە بووە کە مرۆڤ بەردەوام و لە تەواوی کایەکانی ژیاندا خۆی پێوە خەریک کردووە، بە جۆرێک کە هەڵە نییە ئەگەر بڵێین هەموو ئەو شتانەی کە مردن نین، ئەگەریش بۆ ئەوە کار نەکەن ئەوا بەبێ گومان لە شوێنێکەوە ئامانجەکەیان دەچێتەوە بۆ ئەوەی کە مرۆڤ چۆن لە مردن ڕزگاری ببێت، هەر ئەوەیشی کە مردن هەمیشە بە جۆرێک لە نەفیکردنەوە و دژ بە دۆخی ویستراو دانراوە بۆ خودی مرۆڤەکان خۆیان، ئەوا هەر شتێکیش کە پەیوەندیی بە مەرگەوە هەبێت و یەکێک بیەوێت کاری لەسەر بکات، ڕاستەوخۆ دەچێتەوە ئەو قاڵبە نەفیکراوەوە و بە هەرچییەکیش بگات، پێویستە لەو چوارچێوەیەی خۆیدا دەرنەچێت، هەر ئەمەیشە کە ئەوەمان بۆ دەردەخات پرسی ژیانیش لە هەمان قاڵبدایە و هەمیشە بە شتێکی ئەرێنی و ویستراو سەیر کراوە، بۆیە ژیانیش و هەر شتێک کە پێیەوە بەسترابێت، دەکرێت هەمیشە لە چوارچێوەی ویستراودا بێت، کەواتە با لە خۆمان بپرسین: چی دەبێت ئەگەر مردن دۆخە ویستراوەکە بێت و ژیانیش نەویستراوەکە؟

دەریای دەروون فیلمێکە کە تیایدا مردن و ژیان بەو جۆرە پیشان دەدرێن کە ئێمە هەرگیز وێنای ناکەین و ئەگەریش ڕۆژێک لە ڕۆژان لێی نزیک بووبینەوە، هەر زوو لە بیر خۆمانی دەبەینەوە، بەو جۆرەی کە ژیان شتێکی نەویستراو و سەرچاوە بێت بۆ هەموو شتە نەویستراوەکانی تر و مردنیش بە پێچەوانەی ئەوەوە، ئەو شتە بێت کە ڕزگارت ئەکات لە هەموو شتە نەویستراوەکان، هەروەها ئەوەی سەرنجڕاکێشە لەم فیلمەدا، ئەوەیە کە هەرچەندە دەیەوێت ڕوویەکی تر و تێگەیشتنێکی ترت لەسەر پرسی مردن و ژیان پیشان بدات، بەڵام ئەمە وای نەکردووە کە پێناسەی ڕاستەقینەی شتەکان دیار نەمێنن و کاریگەریئان نەمێنێت، بەڵکو بە هەمان شێوەی مەبەستەکە، ئەمیش خۆی دەردەخات و ڕووبەڕووی پێناسە دروستکراوەکە دەبێتەوە و دیبەتێکی بەردەوام و نەبڕاوە هەیە لە نێوان هەردوو پێناسەکەدا، فیلمەکەیش هەرگیز بۆ ئەوە کار ناکات کە پێت بڵێت کام پێناسەیە گونجاوە بۆ پرسی مردن و ژیان و ڕەوایی نادات بە هیچیان، بەڵکو هەردووکیانت لە باشترین دۆخی خۆیاندا پیشان دەدات و پێت دەڵێت کە ئەو شتەی لە مێشکی تۆدایە، هەرچییەک بێت، بە هەمان ڕێژەی ڕاستییەکەی دەکرێت هەڵە بێت و بە جۆرێکی دیکە بێت.