پێکەوە بۆ بینینی فیلم: هۆکاری سادەی ژنێکی ستەملێکراو بۆ جیابوونەوە

مات زۆلەر

لە ئینگلیزییەوە: کۆمەڵەی ٦٨

برایانی ئەلکابێتز لە ڕێگای فیلمی تەڵاقەوە سەلماندوویانە کە یەکێکن لە بەتواناترین دەرهێنەرە سینەماییەکانی ئەم سەردەمە، هەر دیمەنێک لەم فیلمە دەرخەری ئەو توانا ناوازەیەی دەرهێنەرەکانە کە چۆن لە ڕێگای کەمترین جووڵە و وشکترین قسەوە، تەواوی دەروونی مرۆڤیان پیشانی بینەر داوە، سەرەڕای ئەوەیشی کە چیرۆکی فیلمەکە تا بڵێیت هێواش و وشکە و تەنها باسی ویستی ژنێک دەکات کە دەیەوێت لە هاوسەرەکەی جیا ببێتەوە و دادگا قبووڵی ناکات، بەڵام هێشتا لە ڕێگای چیرۆکەکەوە لە جێی ئەوەی تەنها ڕووداوێکت پیشان بدات کە سەرەتا و ناوەند و کۆتایی هەیە، ڕووداوێکت پیشان دەدات کە پێناسەی دەروونی مرۆڤت بۆ دەکات لەم سەردەمەدا، کە چۆن و بە چ ڕێگایەک ئایین و یاسای وەک ئامڕاز لە بەرامبەردا بە کار دەهێنرێت و بووە بە قوربانی دەستی هەردووکیان.

بەشی زۆری فیلمەکە لە ناو دادگادا خۆی دەبینێتەوە، کە ڤیڤیان ئامسالمی کارەکتەری سەرەکی، لە هەوڵی ئەوەدایە لە هاوسەرەکەی جیا ببێتەوە، بەڵام هاوسەرەکەی قبووڵی ناکات و یاسای وڵاتیش بە جۆرێکە کە ویستی جیابوونەوە تەواو دراوەتە دەست پیاو و ژن هیچ مافێکی ئەوەی نییە خۆی داوای جیابوونەوە بکات و دادگایش داواکەی جێبەجێ بکات.

بەشێکی گرنگی چیرۆکەکە لەسەر ئەو هۆکارانەی ڤیڤیان دەسووڕێتەوە، کە بە خاتریان داوای جیابوونەوە و کۆتاییهێنان بە هاوسەرگیرییەکەی دەکات. هۆکارەکانیش تا بڵێیت سادە و سەرەتایین و بە جۆرێکن کە خەڵکی ئاسایی و تەنانەت دادوەرەکانیش ناتوانن بە هۆکاری بزانن بۆ جیابوونەوە، هەر بۆیە بە هیچ جۆرێک داواکەی قبووڵ ناکەن و پێیان وایە کە تەنها لە کاتی بوونی هۆکارێکی زۆر گەورەدا، ژن دەتوانێت داوای جیابوونەوە بکات، نەک لەسەر کۆمەڵە هۆکارێکی سادەی وەک ''ئێمە ناگونجێین''، ''ناتوانم بەم جۆرە ژیانە ڕازی ببم''، ''کەسایەتیمان زۆر جیاوازە و مانایەک لە پێکەوبوونماندا نییە''؛ هەر ئەمەیشە کە نرخی مرۆڤ وەک بوونەوەرێکی ئازاد کەم دەکاتەوە و مافی ئەوەی لێ دەسێنێتەوە کە خۆی تەواوی ژیانی خۆی هەڵببژێرێت و لەو قاڵبە جێگیر و داخراوانەدا دەربچێت، کە نەریتی کۆمەڵگە و ئایینەکان بۆیان داناوە؛ بە تایبەتییش ژن.

گێڕانەوەی چیرۆکەکە لە چاوی کامێراکەوە، هەتا بڵێیت سەرنجڕاکێشە و دەرهێنەرەکان بە جۆرێک وێنەی ڕووداوەکانیان گرتووە، کە ڕاستەوخۆ بینەر بتوانێت مرۆڤ یاخود ژن ببینێت کە چۆن لە بەردەم کۆمەڵێک کەسی وەک دادوەردا دەوەستێت و داوای مافی سەرەتایی ژیانی خۆی دەکات، لە کاتێکدا کە کەسەکان لێی تێناگەن و تەواوی بڕیارەکانیشیان بەندە بەو بەرژەوەندییانەی کە بەردەوامی بە دۆخەکە دەدات.

لە هەموویشی گرینگتر، ئەو پەیوەندییە سەیرەیە کە لە نێوان بینەر و ڤیڤیاندا دروست فەبێت و بینەر هەتا زیاتر سەیری فیلمەکە بکات، زیاتر لە ڤیڤیان تێدەگات؛ تا دەگات بەوەی کە بینەر بتوانێت پێشبینیی جووڵە و قسەکانی ڤیڤیان بکات، ئەمەیش خۆی بۆ خۆی خاڵێکی زۆر بەهێزی فیلمەکەیە و جیاواز لە فیلمی ٧ ڕۆژ یان فیلمی بۆ بردنی ژنێک، کە فیلمی برایانی ئەلکابێتزن و بینەر زۆر باشتر پەیوەندیی خۆی لەگەڵ کارەکتەردا دروست دەکات.