نامەیەک لە کچێکی داخلیی قلیاسانەوە، کە بە ئەستەم لە سێ سەگ ڕزگاری بوو

خێڵان نەوزاد

ئێوە، بە دەسەڵاتدار و ئۆپۆزیسیۆن، بە ئیسلامی و عەلمانیتانەوە، ئەم وڵاتەتان کردووەتە بێئەخلاقخانەیەکی گەورە و لە ھەر بەهایەکی ئینسانی خاڵیتان کردووەتەوە... ئێوە مرۆڤی ئەم وڵاتەتان کردووەتە کەرەستەیەکی سیاسەتی نائەخلاقیتان، ئەوەی کە دەتانەوێت و ئیشی بۆ دەکەن، تەنها کۆمەڵێک مەرام و ئامانجی گڵاوی دوورە لە ھەر بنەمایەکی ئەخلاقی و مرۆیی!

کچانی داخلیی قلیاسان بەدەست دنیایەک سەگی بەڕەڵاوە هەراسان بوون، پێیان وترا ''قەحبە''، لێیان درا؛ ئەوە وتمان حیزبە دەسەڵاتدارەکان بەشێک بوون لێی ویستیان بەردەپۆشی بکەن... ئەی حیزبە بە ناو ئۆپۆزیسیۆنەکان، بە ئیسلامی و عەلمانییەوە، بۆ دەستتان بەسەر ناڕەزایەتییەکانی خوێندکاراندا گرت و بە مەرامە گڵاوەکانتان ئەو ھەموو سووکایەتییەتان پەردەپۆش کرد و بە دەرکردنی کۆمەڵێک بەیاننامەی پڕوپووچ لە لایەن خوێندکارە بووکەڵەکانی خۆتانەوە، ئەو ھەموو سووکایەتییەتان پەردەپۆش کرد و مەرامە گەمژانەکانی خۆتان بەیان کرد: ''لابردنی فڵان بەرپرس، ئاوی گەرم، ھەوای گەرم، دەرماڵە...'' دڵنیام خۆیشتان لە درۆ و دەلەسەیی ئەم داواکارییە بێمانایانەتان زۆر دڵنیان، کە ھیچ ڕیشەیی نین و ئەسڵەن درێژەدانن بەم سیاسەت و حوکمڕانییە نائەخلاقییەی ئێستا.

کێشەی خوێندکاران زۆر لەمانە ڕیشەییترن؛ خۆم لەگەڵ یەکێک لە سەرۆکەکانتان دانیشتم، کە وام زانی بۆ کێشەی خوێندکاران بانگی کردووم و دەیەوێت ھاوکار بێت، بەڵام ئەو ویستی ''ئیش''ی بۆ بکەم و ھاوکاریی حیزبەکەی بکەم و ببمە کەرەستەی! پێم وت: ''تکایە، خوێندکارەکانتان ئەو داواکارییانەی دەیگەیەنن لە بەیاننامەکاندا و خۆیان کردووە بە وتەبێژی خوێندکاران و میدیای بۆ بەکار دەھێنن، داواکاریی خوێندکاران نین و بەم سیاسەتی ئیشکردنەتاندا بچنەوە.'' بەڵام وتی: ''ئێمە ناتوانین دەست بۆ ھەندێک بابەت بەرین، چونکە دەنگدەر لە دەست دەیەین!''

مەرامی دەسەڵاتداران لە کپکردنەوەی دەنگی ناڕەزاییدا چەند ڕوونە، تەداخولی ئێوەیش لە دوای ١٧ی شوباتەوە لە ھەر خۆپیشاندانێک و ناڕەزاییدەربڕینێک، ھێندە ڕوونە! دەسەڵات چەند دەنگی ناڕازیی کوشتووە، ئێوە بە تەداخولکردن بۆ مەرامە پیسەکانتان، دوو ھێندە!

ویستم دوێنێشەو ئەم نامەیەتان بۆ بنووسم، کە زۆر بە ئەستەم لە سێ سەگی ئەم داخلیی قلیاسانە ڕزگارم بوو، بەڵام دۆخی دەروونیم زۆر خراپ بوو... ھەتا ئێستایش وێنە و دەنگەکان لام دێن و دەچن و باوەڕ بەوە ناکەم کە ڕزگارم بووە!
لێرە کێشەی کەرامەت و شکۆی ئینسان زۆر پێش ئاو و ھەوای گەرمە! لێرە دنیایەک سەگی بەڕەڵا ھەیە و کچێکی زۆریان تووشی حاڵەتی خراپی دەروونی و برینی جەستەیی و ڕۆحی  کردووە!

تێبینی: ھیوادارم ڕێکخراوە ئاژەڵدۆستە حیزبییەکانیش کە ئەم کێشەیەیان لەگەڵ کچەکان کردە ململانێ و سیاسەتی ئیشکردنیان ڕوون بوو، کەمێکیش مرۆڤدۆست بن. من لێرەوە بانگهێشتیان دەکەم و تکایان لێ دەکەم کە بە ڕێکاری پێویست و مرۆییانە، ئەم سەگانە لێرە بەرنە دەرێ...