ئەرکە دەستبەجێکان

بزاوتی خۆڕسکی ڕای دەگەیەنێت، پێداویستییە سەرەتاییەکانی وەک ''ئاو و هەوای گەرم و پاککردنەوەی داخلی و سکووڵەکان و دابینکردنی دەرماڵەی خوێندکاران''، لەپێشینەن و پێویستە ئیدارەی زانکۆی سلێمانی بە زوویی جێبەجێیان بکات، چونکە ئەمانە ئەو ماف و ئازادییانە نین کە خوێندکاران لە دەوری کۆ بوونەتەوە و هەوڵی گۆڕینی دەدەن، بەڵکو خواستی خوێندکاران و ئەو داواکارییانەی هەیانە، لەم پێداویستییە سەرەتاییانە ڕیشەییترن و نابێت بە دابینکردنی خزمەتگوزارییەکان و دەرماڵە پاشەکشەیان لێ بکرێت، کە لەم خاڵانەی خوارەوەدا خۆیان دەبیننەوە:

1.      نەهێشتنی ئەو کەشە پۆلیسی و عەسکەرتاریەتەی باڵی بەسەر فەزای زانکۆی سلێمانی و داخلییەکانیدا کێشاوە - بە تایبەت داخلیی کچان - کە هەر هەڵسوکەوت و مامەڵەیەکی کچە خوێندکاران لەژێر کۆنترۆڵی پۆلیس و چاودێرەکاندایە و هیچ بوارێکیان بۆ سەربەخۆیی خوێندکاران نەهێشتووەتەوە.

2.      لابردن و دوورخستنەوەی دەستبەجێی ئەو چاودێرانەی لە داخلییەکاندا بەبێ هیچ بنەما و پسپۆڕێتییەک بەسەر خوێندکاراندا کراونەتە ''چاودێر''، کە خودی ئەم چاودێرانە هۆکاری سەرەکین بۆ دروستبوونی ئەو کەشە زیندانئاسایەی لە داخلییەکاندا دروست بووە.

3.      بنەبڕکردن و نەهێشتنی ئەو دەستدرێژییانەی بە ناوی ''پاراستنی خوێندکاران''ەوە، دەکرێتە سەر ژیانی شەخسی و تایبەتیی خوێندکاران لە ناو زانکۆی سلێمانیدا بە گشتی و بە تایبەتییش لە ناو داخلییەکانیدا، کە خۆیان لە مەسەلەی پاراستنی ''شەرەف'' و ''ئەخلاق'' و سنووردانان بۆ هەڵسوکەوتی خوێندکاراندا دەبیننەوە، چونکە خوێندکاران خۆیان خاوەنی کەرامەتن و پێویستیان بە هیچ چاودێر و پۆلیسێکی ئەخلاقی نییە بیانپارێزێت؛ سەرەڕای ئەوەیش، زانکۆ شوێنی خوێندنە و داخلییش شوێنی حەوانەوە.                                                                                

لەگەڵ ئەم سێ خاڵەدا کە وەک ئەرکی دەستبەجێ دەستنیشانمان کردن و بۆ هەر یەکێکیشیان بەڵگە و دیکۆمێنتمان لە بەردەستدان، کۆمەڵێک ئەرک و خاڵی دەستبەجێی دیکە هەن، کە لە کات و شوێنی تردا دەیانخەینە ڕوو. هاوتا لەگەڵ ئەمانەیشدا، مانیفێستێکمان وەک کارنامەی خوێندکاران نووسیوە و بڵاوی دەکەینەوە، کە تێیدا بە وردی ئایدیا و داواکارییەکانمان خستوونەتە ڕوو. بۆ بەدیهێنانی ئەمانەیش، جگە لەوەی لە ناو زانکۆی سلێمانیدا درێژە بە چالاکی و گردبوونەوەکانمان دەدەین، داوا لە ئیدارەی زانکۆکە دەکەین وەک لایەنی یەکەم و پەیوندیدار بەم پرسانەوە، لەگەڵماندا کۆ ببێتەوە و دانوستان بکەین. 

بزاوتی خۆڕسکی خوێندکاران، زانکۆی سلێمانی

١\١٢\٢٠١٨

(بزاوتی خۆڕسکی خوێندکاران، بزاوتێکە لە دەرەنجامی گردبوونەوە و ڕێپێوانەکانی خوێندکارانی زانکۆی سلێمانی لە ٢٣\١١\٢٠١٨ و ڕۆژانی دواییەوە پێک هات و ئامانجی سەرەکیی، سازشنەکردنە لەسەر کۆمەڵێک داواکاریی ڕیشەیی لە نموونەی مرۆڤبوون، کەرامەت، ئازادیی خوێندکاران لە بەرامبەر دابینکردنی خزمەتگوزارییە سەرەتاییەکاندا، هەروەها نەقۆستنەوەی ناڕەزایی خوێندکاران لە لایەن ئەو حیزبانەی دەیانەوێت بۆ مەرامەکانیان تێکەڵ بە خوێندکاران دەبن)