٥٠ ساڵی نەزۆک: چ زانکۆیەک؟ چ بەرهەمێک؟

(٢)

کۆمەڵەی ٦٨

یادی ٥٠ ساڵەی دامەزراندنی زانکۆی سلێمانی زۆر نزیک بووەتەوە، بە خوێندکار و مامۆستاوە، هەموو خۆیان بۆ ئەو ڕۆژە ئامادە کردووە. بەشێکیان تا لە ''چالاکییە گەورەکە'' بەشدار بن، بەشێکی زۆریشیان تەنها بۆ ئەوەی ٢ ڕۆژ پشوو وەربگرن. لەم نێوانەیشدا هیچ کەس و لایەنێک نەمایەوە کە لە خۆی و هەموو ئەوانی تریش بپرسێت: ''ئەم یادە بۆ؟'''

هیچ کەسێک نییە کە لە دواکەوتوویی و خراپیی بارودۆخی ئێستای باشووری کوردستان ئاگادار نەبێت، بە جۆرێک کە ئەگەر لە منداڵێکیش بپرسیت، دەتوانێت پێت بڵێت کە ''قەیران'' و ''نەهامەتی'' و ''گەندەڵی'' چییە. ئەگەر ئەم پرسیارانە لە سەردەمی پێش ڕاپەڕیندا بکرانایە، ئەوا یەکسەر باسی ژێردەستەیی و داخرانی کۆمەڵایەتی و نەبوونی دەرفەت دەکرا، بەڵام سەیر لەوەدایە ئێستا هیچ شتێک لەو هۆکارانە بوونیان نییە، کەچی دۆخەکە زۆر لەوکات خراپترە، هۆکارەکانیش ئەگەر بە ڕووکەش زۆر و ئاڵۆز بن، ئەوا لە ناوەڕۆکدا هەتا بڵێیت سادەن و بەشی زۆریشی دەکەوێتەوە سەر زانکۆ و بەرهەمی زانکۆ.

بێگومان لە دوای ڕاپەڕینەوە یەکەم شوێن کە بتوانێت کاریگەریی ڕاستەوخۆ بۆ داهاتووی باشوور دروست بکات، زانکۆیە، چونکە هەر ئەوێیە کە وزەی تاکەکان کۆ دەکاتەوە و هەر ئەویشە دواتر لە ڕێگای دەرچووەکانیەوە کۆمەڵگەکە بەڕێوە دەبات، بە تایبەت بەم سیستەمە حکومڕانییەی ئێستا کە زۆرینەی چالاکییەکانی لە ڕێگای حکومەتەوەیە و تەنها لە زانکۆیشەوە دەتوانیت ببیت بە بەشێک لەم چالاکییانە، بۆیە بێگومان ئەوەی ئێستا کە هەیە و کار دەکات، بەرهەمی زانکۆیە. ئەم بەرهەمە لە باشترین دۆخیدا سیاسەتمەدارێکی گەورە، یان سەرمایەدارێکی گەورە، یاخود ''ڕۆشنبیر''ێکە، ئەگەر ئێمەیش لەم ئاستە باڵایەوە دەست پێ بکەین، پێویستمان بە کاتێکی ئێجگار کەم دەبێت بۆ دەرخستنی ئەوەی کە هەر ئەم ٣ توێژەن هەموو قەیرانەکانیان دروست کردووە، کە ئەمانەیش باشترینەکانی بەرهەمی زانکۆ بن، ئەی خراپترینەکان دەبێت چی بن؟!

ئەگەر سلێمانی و زانکۆی سلێمانی بە نموونە بهێنرێتەوە، لە هەموو شوێنێک زیاتر ئەم شکستەی زانکۆی تێدا بەدی دەکرێت؛ لەم شارەدا بێشومار ڕۆشنبیر و سیاسی و سەرمایەدار هەن کە زۆرینەی ئەم کەسانە، هەر ٣ شتەکەن لە هەمان کاتدا، هەروەها زیاتر لە شوێنەکانی تر چالاکیی سیاسی و کۆمەڵایەتیی تێدا دەکرێت و ئایکۆنی فیگەری زیاترە، کەچی ڕۆژ بە ڕۆژ کێشەکان زیاتر دەبن و هیوای باشتربوونیش لەم شارەدا کەمتر دەبێتەوە، زانکۆی سلێمانییش ئەگەر هەر خۆی بە تەنیا هۆکار نەبێت، ئەوا هێشتا یەکێکە لە هۆکارە هەرە سەرەکییەکانی ئەم بارودۆخەی شارەکە و باشوور.

کەواتە یاد لەپێناو چیدا بکرێتەوە و دڵ بە چی خۆش بکرێت، کە بە درێژایی ئەم ٥٠ ساڵە، کاری زانکۆی سلێمانی تەنها بەتاڵکردنەوەی وزە و تواناکانی خوێندکاران و پاشخستنیان لە هەموو ڕووەکانەوە بووبێت! بێگومان کەس ئەوەندە نەفام نییە دڵی بەم بەرهەمە خۆش بێت و بە شایەنی ئەوەی بزانێت مەڕاسیمی بۆ بگێڕرێت و شانازیی پێوە بکرێت، هەر بۆیە پێشوازیی مامۆستا و خوێندکارەکانی زانکۆیش لەم بۆنەیە، تەنها لەبەر ٢ ڕۆژ پشووەکەیە.