ڕەخنە لەبری پیاهەڵدان: بە بۆنەی یادی ٥٠ ساڵەی زانکۆی سلێمانییەوە

کۆتایی مانگی ١١ی ئەمساڵ، ٢٠١٨، تەمەنی زانکۆی سلێمانی دەبێتە ٥٠ ساڵ و وا بڕیارە ئیدارەی زانکۆکەیش بە دروشمی ''مێژوویەک لە شکۆ و ئایندەیەک لە داهێنان''، ''یۆبێلی زێڕین''ی بۆ ساز بکات و بە کردنی ٢ ڕۆژ بە پشوو و گێڕانی چەند مەڕاسیمێک، یادی بکاتەوە.

کۆمەڵەی ٦٨، وەک کۆمەڵەیەکی خوێندکاری و بەپێی ئەوەی بەشێکی زۆر لە ئەندامان و هاوڕێیانی، خوێندکار و دەرچووی ئەو زانکۆیەن و ساڵانێک تێیدا ژیاون، لە بلۆگی ڕەت زنجیرەیەک نووسینی ڕەخنەیی بەپێی ئەم ٢ بەشەی خوارەوە، بڵاو دەکاتەوە:

٥٠ ساڵی نەزۆک

تێیدا چەند کێشە و گیروگرفتێکی ڕیشەیی و قووڵ و جیدیی زانکۆکە بە چەند نووسینێک باس دەکرێن، کە بوونەتە شوناسی و سەرەڕای ئەوەیش، زانکۆکە نەک ئامادە نییە چارەیان بکات، بەڵکو دانیشیان پێدا نانێت.

زانکۆی سلێمانی و یادەوەریی خەمناکی خوێندکارانی

تێیدا خوێندکاران و دەرچووەکانی زانکۆکە، چەندین وێستگە و ئەزموونی تاڵ و خەمناکی خۆیان دەگێڕنەوە، کە کاریگەریی لەسەر ڕێڕەوی ژیان و بیروبۆچوونیان هەبووە.

هەر هاوڕێیەک دەیەوێت بەشدار بێت، بێگومان پەیوەندیمان پێوە بکات.