٥٠ ساڵی نەزۆک: چ مێژوویەک لە شکۆ و کامە ئایندە لە داهێنان؟

(١)

ن: کۆمەلەی ٦٨

گومان لەوەدا نییە زانکۆی سلێمانی – وەک یەکەم زانکۆی کوردی – لەو سەردەم و هەلومەرجەی تێیدا دروست بووە، ڕۆڵ و کاریگەرییەکی بەرچاوی لەو ئەرکانەدا هەبووە کە هەر زانکۆیەک هەیەتی. پێبەپێی ڕۆژگارەکانیش، زانکۆکە بە کۆمەڵێک ڕووداودا تێپەڕیوە و بگرە لە هەر دامودەزگایەکی تری حکومی و ناحکومی، زیاتر بەشداریی لەو ڕووداوانەدا هەبووە.

دیسانەوە بێگومان: زانکۆی سلێمانی خاوەنی کارەسات و خۆڕاگریی قەڵادزێیە، خاوەنی ڕاگواستنیەتی بۆ هەولێر، خاوەنی شەهید فاتیحە، خاوەنی پرۆتستۆ و ناڕەزایەتیی سەرەتای هەشتاکانی سەدەی بیستە، خاوەنی کۆڕاڵ و چەندین چالاکیی جۆراوجۆری خوێندکارییە و لە هەمووی گرنگتر، خاوەنی بەشێک لە ١٧ی شوبات و ڕۆژانی دواییە... لەگەڵ هەموو سەرنجەکان لەسەر خودی ئەم سەروەرییانە، هێشتا بێگومان زانکۆی سلێمانی خاوەنی ئەم ''مێژوو''ەیە؛ بەڵام دەستەواژەی ''زانکۆی سلێمانی'' کێ دەگرێتەوە؟

پێش هەر ڕوونکردنەوە و درێژدادڕییەک، دەبێت هەموو ئەوانەی ''شانازی'' بەم مێژووەوە دەکەن و بە ''شکۆ''داری لەقەڵەم دەدەن، بوەستێنین و شۆکیان بکەین: ستۆپ! ''ئیدارە''ی زانکۆی سلێمانی خاوەنی ئەم مێژوو و سەروەرییانە نییە!

خوێندکاران خۆیان دروستکەری ئەو مێژووە و هەموو سەروەرییەکانین، هەر خۆیشیانن کە دەبێت شانازیی پێوە بکەن. ئیدارە یەک لە دوای یەکەکانی زانکۆی سلێمانی، جگە لە ڕێگری لە بەردەم ئەو هەموو وزە و هێزەی گەنجان و خوێندکارانیان هەیانبووە، هیچی تر نەبوون؛ مەهزەلەکە ئەوەیە ئەو مێژووەی ئێستا ئیدارەی زانکۆکە بە پڕشکۆی دەبینێت، خوێندکاران لە ڕووبەڕووبوونەوەی سیستەمە چەوسێنەرەکەی ئەوان دروستیان کردووە.

ئیدارەی زانکۆی سلێمانی و پسپۆڕەکانی، ئەگەر لە هیچ شتێکدا شارەزا نەبن، لەوەدا شارەزان کە ئایندەی خوێندکارەکانیان تەفروتوونا بکەن، ئیتر باسی کام ''ئایندە''یە لە ''داهێنان'' دەکەن؟ کامەیە پەروەردە و مەعریفەکەی ''زانکۆی دایک''؟ کوا بەرهەمی ئەو سوپا بڕوانامەدارەی ساڵانە بەرهەمیان دەهێنێت؟ ئەسڵەن زمانی ئینگلیزی و عەرەبی و ئەوانی تر نا، فێرکردنی زمانەکەی خۆمان، کوردی، کوا؟ ئیتر ئەم ئایندەیە کامەیە؟ لە کوێدایە؟ داهێنانەکەی لە چ قوژبنێکدایە وا ئێمە نایبینین؟ ئەوەیە کە خوێندکارێک بە یەکدنیا خەون و ئاوات و هیوا و ئومێدەوە دێتە قۆناغی ١، دوایی بە تێکشکاوی و داڕماوی و دەروونێکی بیمار و عەقڵێکی کڵۆڵەوە دێتە دەرێ؟

ئیدارەی زانکۆی سلێمانی دەبوو شەرمی بکردایە و لەم یادەدا لەبری ''یوبێڵی زێڕین''، داوای لێبوردنی بۆ ئەو ٢٦ ساڵە مەنگ و خەمناکەی بەڕێوەبردنی بکردایە و لەجیاتیی ٢ ڕۆژ پشووی بێبەرهەم و مەڕاسیمی بێتامی موجامەلە و دیوەخانئاسا، لە تەوالێتە بۆگەنەکانی داخلی و بەشە پەراوێزخراوەکانیدا، گوێی لە کۆژانی خوێندکارە تووڕەکان بگرتایە.

بێگومان ئەم ٥٠ ساڵە بۆ ئیدارەی زانکۆی سلێمانی نەزۆک و هیچلەبارانەبوو بووە، بۆ ئێمەی بەشێک لە خوێندکاران و ڕێبوارانیشی، پڕ بەرهەم و کاری مێژوویی. بزۆکی و جووڵەی هەمیشەی خوێندکارانی زانکۆکە و کۆمەڵەی ٦٨ وەک نموونە، بەرهەمی خەبات و تێکۆشانی خۆمانە، نەک ئەو ئیدارە فاشیلەی تەنانەت بۆ چوونە یەکێک لە هۆڵەکانیشی ڕێمان لی دەگرێت.