ژمارە ٣ی بڵاوکراوەی ڕەت بڵاو دەکرێتەوە

دوای بڵاوبوونەوەی ژمارە ١ و ٢ی بڵاوکراوەی ڕەت لە پاییزی ٢٠١٧ و زستانی ٢٠١٨ لە زۆرینەی زانکۆ و پەیمانگەکانی باشووری کوردستان، لە ئێستادا ژمارە ٣ی بڵاوکراوەکە ئامادەیە و لە چەند ڕۆژی داهاتوودا بە هەمان شێوەی ژمارە ١ و ٢، لای زۆرینەی خوێندکاران و گەنجانی باشووری کوردستان دەبێت.

ئەم ژمارەیەی بڵاوکراوەی ڕەت تایبەتە بە بارودۆخی ژیانی کچانی زانکۆ و ئەو کۆژان و ئازارە پەنهان و شاراوانەی هەیانە، کە بووەتە هۆی پلەدووییان و پەراوێزکەوتن و پاسیڤبوونیان لەو ڕووداوانەی ڕوو دەدەن، هەروەها ئەو دنیای مۆدە و جوانکارییانەی وەک ئەفیون  بە ناو خوێنیاندا بڵاو بووەتەوە و کردوونی بە بووکەڵەی بازاڕ و چەند هێندەی تر پاشەکشەی پێ کردوون. وتارەکانیش بریتین لەمانە:

·        چاودێر و پۆلیسەکانی ئەخلاق و یاسا نەریتییەکانیان

ن: سۆزان کەمال

·        کچانی زانکۆ: بووکەڵەکانی سەرمایەداری

ن: شێنێ یاسین

·        بوون بە شاجوان: لەدایکبوونێکی پیاوانە

ن: زەردەشت نورەدین

·        هەر ئەوەندەی زانیمان کۆیلە کراوین...

ن: ئاڤان کەمال

·        لیبیدۆی خوێندکار

ن: حەمەی مەلا 

بڵاوکراوەی ڕەت بێبەرانبەر بڵاو دەکرێتەوە و بەسەر خوێندکاراندا دابەش دەکرێت. هەروەها لەبەر ئەوەی توانای دارایی کۆمەڵەی ٦٨ سنووردارە و بە هاوکاریی ناوەندی غەزەلنووس و چەند هاوڕێیەکی دیکە بڵاوکراوەکە چاپ دەکرێت، توانراوە تەنها ١٠٠٠ دانەی لێ چاپ بکرێت. هەر بۆیە لە کاتی دابەشکردنی بەسەر خوێندکاراندا، هەوڵ دەدرێت هەر ٢ بۆ ٥ خوێندکارێک، نوسخەیەکیان بدرێتێ و پێکەوە بیخوێننەوە؛ وەک ئامڕازێکیش بۆ تۆکمەکردنی پەیوەندییەکانمان و دروستکردنی هاوڕێیەتییەکی سیاسی.

لە لاپەڕە ١ی ژمارە ٣ی بڵاوکراوەی ڕەتدا، لە خوار دەرگای بەشەناوخۆیی کچانی زانکۆی سلێمانی، کە لە ڕۆژی ڤالانتایندا لە سەعات ٢:٠٠ی نیوەڕۆوە قفڵ و زنجیر کراوە، نووسراوە:

''کچان لە زیندانی باوک و براکانیانەوە دێنە زانکۆ و ئومێدی کەمە ئازادییەک دەکەن، بێئاگا لەوەی لەوێش دنیایەک تەلبەندی تیژ و دەرگای قوفڵکراو هەن...

کچان لێرەش، لەم دەزگا مەعریفییە باڵایەشدا، هەر پلەدوون، هەر دەبێت پێش بانگی ئێوارە بچنەوە، هەر شەرەفن، ئەسڵەن لە ڕۆژی عاشقاندا لە نیوەڕۆوە دەرگایان لێ دادەخرێت...

کچان چی بکەن؟ چۆن ئەم دەرگا قوفڵکراوانە بشکێنن و بەسەر تەلبەندە تیژەکاندا باز بدەن؟ دەتوانن؟''