پێکەوە بۆ بینینی فیلم: داگیرگەی کەرامەت

شاهۆ عەلی

ئایین و دەسەڵات: دوالیزمەکەی سیستم و تەواوکەرەکانی یەکتر، یان دەقیقتر: حەقیقەتە دیالێکتیکەکەی.
نیولیبڕاڵیزم، دوا فۆڕمە ئایدیۆلۆژییەکەی سەرمایەداری، لەگەڵ چەکەرەکردنی لە سەرەتای حەفتاکانی سەدەی ڕابردوودا، بە هۆی ئەم دوالیزمەوە وەحشیگەرییەکی نوێی هێنایە بوون، کە چیللی یەکەم وڵاتی دنیا بوو بەر شاڵاوەکەی کەوت و کرا بە تاقیگەی ئەم دۆکترینی شۆکە، بە قەولەکەی نایۆمی کڵاین. ئەمڕۆ باشووری کوردستان و عێراقیش بە تەقاندنەوە و نەهێشتنی بینا و سێکتەرەکانی کەرتی گشتی و خەسخەسەکردنیان و بەهێزبوونەوەی کۆنەپارێزیی ئاینی و خێڵەکی و بەمیلیتاریزمکردنی کۆمەڵگەکان، زەمینەسازییەکە کە ١٤ ساڵ زیاترە دەستی پێ کردووە بۆ جێگیرکردنی ئەم سیستمە.

داگیرگەی کەرامەت (بە زمانی چیللی: کۆڵۆنیا دینگیداد)، لە دەرهێنانی دەرهێنەری ئەڵمانی فلۆریان گالێنبێرگەر و لە نواندنی ئێما واستۆن و دانیەڵ بروهڵ، یەکێکە لەو فیلمە ناوازە و کەموێنانەی کە لەسەر بنەڕەتی ڕووداوێکی ڕاستەقینە بونیاد نراوە. باس لە چیرۆکی کۆمۆنیستێکی ئەڵمانی دەکات بە ناوی دانیاڵ، کە بۆ پشتیوانیکردن لە ئەزموونی دادگەریی چیللی بە سەرکردایەتیی ئەلەندێ، ڕوو دەکاتە ئەو وڵاتە و بە هۆی کودەتاکەی پینۆچێوە، دەستگیر دەکرێت و دەبرێتە ئەم داگیرگەیە. لەوێ دووچاری جۆرەها ئەشکەنجە و هەوڵی مێشکشۆردنەوە دەبێتەوە، لە ڕێی کۆمەڵێک مەڕاسیم و ڕێسای ئایینی و ئەشکەنجەدانی سەربازیی تایبەتەوە، کە لە لایەن کۆنە قەشەیەکی نازییەوە بەڕێوە دەبرا بە ناوی شێفەر و بە پەیڕەوکردنی داهێنانە هەواڵگرییەکانی سی ئای ئەیی ئەمەریکی لە بواری ئەشکەنجەداندا، ئەمەش بە سەرپەرشتیی ئەمەریکا و بەشداریی ئەڵمانیا و پشتیوانیی کەنیسەی کاسۆلیکی.

لەو داگیرگەیەدا، ژن و پیاو و منداڵ جیا کرابوونەوە و پیاوەکان حاکمی شوێنەکە بوون، ژنان قێزەوەن دەکران و ڕۆژانە کاری قورسیان پێ دەکرا و بەرەوڕووی سووکایەتی و ئەشکەنجەدانی توند دەکرانەوە، چونکە ''هەڵگری خەسڵەتەکانی شەیتانن و هۆکاری گوناهەکانی جەستەن''، منداڵەکانیش ڕووبەڕووی دەستدرێژیی سێکسی دەبوونەوە.

لە کۆتاییدا کاتێک دانیاڵی شۆڕشگێڕ و دڵدارە بەوەفاکەی لە کۆڵۆنیا دینگیداد ڕادەکەن، ئەم دیوە وەحشیگەرییەی تری نیولیبڕاڵیزم لە چیللی، بۆ دنیا ئاشکرا دەکەن.

ئەم فیلمە لە چوارچێوەی پڕۆژەی پێکەوە بۆ بینینی فیلم نمایش کرا و دوابەدوای بینینی بینەران گفتوگۆیان دەربارەی کرد