پێکەوە بۆ بینینی فیلم: تەمی جەنگ

لە ئینگلیزییەوە: کۆمەڵەی ٦٨

لە تەمدا فیلمێکی تەواو توند و خاڵی لە گاڵتەوگەپە، هاوشێوەی ئەو ململانێیانەی لە ڕۆمانەکانی تۆڵستۆی و دۆستۆیڤسکیدا ڕووبەڕووی دەبینەوە، ململانێیەکی کۆمەڵایەتی و ڕۆحییە. فیلمێکە دەربارەی چارەنووس و ئیرادەی ئازاد، شاکارێکی هونەریی سینەمای جیدییە و تایبەتە بە جەنگ. درێژخایەنە، خاو و قووڵە وەک گۆڕ، لە تەمێکی زۆردا نوقمە. لە ڕۆمانێکی نووسەری بیلاڕووسی ڤازیلی بایکۆڤەوە وەرگیراوە و سێرجەی لۆزنیتسا دەرهێنانی بۆ کردووە.

جەنگی جیهانیی دووەمە، تۆڵە دەفرێکی سارد و تاڵ و لەکەداری ناو ئەم ماراسۆنەیه. سەروەختی تێپەڕبوونی جەنگاوەرە پارتیزانەکان و سەربازە نازییەکانە، سێ کارەکتەریش بە دارستانێکی ڕووسیادا ڕەت دەبن. ئەم پیاوانە مڕومۆچ و ساردن، ڕەنگە وەرگەڕانی ڕووداوەکانیش لە ماندووێتییەکی ڕووتی بوونگەراییانەی کارەکتەرەکانەوە بێت. زۆربەی دیمەنەکان لە دارستانێکدان و فیلمەکە جگە لە چەند دەنگێک کە زیاتر لە فۆلکلۆر دەچن، بێ موزیکە و ئەوەی هەیە دەنگی سروشتە. کارەکتەرەکان لە جێگە و کاتێکدان کە باش و خراپ ڕوونە، کە جیهان و هەڵبژاردەکانی دڕندەن. بەڵام سەرباری ئەو وێرانکارییانە، لۆزنێتسای دەرهێنەر لە ناو کارەساتەکانی مرۆڤدا بە شوێن باشییەکانیدا دەگەڕێت. بە شێوەیەکیش کە بینەر قایل بکات، نواندنی بۆ کراوە، وا دەکات بکەوینە مشتومڕێکی ئەخلاقییانەوە، کە لە ماوەی فیلمەکەدا هاوەڵیی ئۆدیسەی پڕمەترسیی ئەم سێ کارەکتەرە سەرەکییە دەکەین، ئەوانیش سوشێنیا، ڤۆینیک و بۆرۆڤن.

تەم لێرەدا هەم بە مانای وشە تەمە، هەم بە شێوەیەکی خوازراویش تەمی جەنگە، کە گێژاوی بە دەوری سێ کارەکتەرە سەرەکییەکەدا دروست کردووە.

*

فیلمی لە تەمدا

لە دەرهێنانی سێرگێی لۆزنیتسا

ئەم فیلمە لە چوارچێوەی پڕۆژەی پێکەوە بۆ بینینی فیلم نمایش کرا و دوابەدوای بینینی بینەرانی گفتوگۆیان دەربارەی کرد