پێکەوە بۆ بینینی فیلم: سروشتی ڕاستەقینەی مرۆڤ لە فیلمی کوێریدا

لە ئینگلیزییەوە: ساڤان ئاکۆ

کوێری فیلمێکی مەجازییە، دەربارەی کۆمەڵێک خەڵکە کە لەژێر زەبرێکی سەختدا دەربازیان دەبێت. لە شارەکانی تۆرنتۆ، تۆکیۆ و سان پاولۆ، خەڵک یەک لە دوای یەک بینایی لەدەست دەدەن. ئەم نەخۆشییە بڵاو دەبێتەوە و هۆکارەکەشی نادیارە، لە سەرەتادا لەپڕ شۆفێرێک کوێر دەبێت، پاشان دکتۆری چاوی ئەو شۆفێرەش کوێر دەبێت و بەم جۆرە بەردەوام دەبێت تا زۆرینەی خەڵکەکە کوێر دەبن، جگە لە هاوژینی دکتۆرەکە.

کوێربووەکان لەم دۆخەیاندا وەک ئاژەڵ مامەڵەیان لەگەڵدا دەکرێت و دەبرێنە کامپێکەوە کە خراپترین و ناهەموارترین شوێنە بۆ ژیان، ئەوان نە دەزانن و نە بۆیان گرنگە کێ مامەڵەیان لەگەڵدا دەکات و بەرانبەر کێ وەستاون. لە ناویاندا یەک کەس، کە هاوژینی دکتۆرەکەیە، بە نهێنی دەتوانێت ببینێت و لەبەر هاوسۆزی بۆ هاوسەرە کوێربووەکەی، هاتووەتە کەمپەکە. تەنها ئەوە دۆخەکە دەبیینێت، کە تێیدا چۆن جیهان بەرەو مەترسییەگی خەتەرناک دەڕوات.

زۆرێک لە کوێربووەکان دووچاری برسێتی و خەمۆکی دەبنەوە، لەم دۆخەدا  کەمپەکە بەسەر سێ گرووپدا جیا دابەش دەکرێن، کێشە گەورەکە لە گرووپی سێیەمدا دەبێت و هەر ئەوانیش دروستی دەکەن، ئەویش بە هۆی سەرۆکە دڕندەکەیانەوە، کە چەکێک دەدۆزێتەوە و بە هێزی ئەوە دەست بەسەر خواردنی گرووپەکانی تردا دەگرێت و دواتر لە بەرانبەر زێڕ و سێکسدا لەگەڵ گرووپەکانی تردا دەیگۆڕێتەوە.

چیرۆکی ئەم فیلمە هیی ڕۆمانیکی ژوزێف ساراماگۆیە، فێرناندۆ مەیلز دەرهێنەریەتی، کە لە چاوپێکەوتنێکدا دەڵێت: ''بۆ من ئەوەی ئەم چیرۆکە دەری دەخات ئەوەیە کە سروشتی ئێمەی مرۆڤ چییە و مرۆڤ خۆی چییە، ئێمە لەبەر ئەوەی توانای بینینمان هەیە، زۆر جێگیرین، بەڵام دواتر کە ئەو سەرچاوەیە لەدەست دەدەین و بە هۆیەوە کار لە سەرچاوەکانی دیکەشمان دەکات و ناچار دەین خۆمان ڕێک بخەینەوە، بەم جۆرە تەنها خۆمان دەبینین و بۆمان ڕوون دەبێتەوە کە ئێمە چیین. مەبەستم ئەوەیە ئێمە زۆر سەرەتایین، وەک ئاژەڵین، فیلمەکەش هەر ئەوە دەخاتە ڕوو: وێنەیەکی کامڵی سروشتی مرۆڤە و باس لە ئاسان تێکشکانی کۆمەڵگە و تاکەکانی دەکات دەکات.

''ژولیان مۆر، ئەکتەری سەرەکیی فیلمەکەش دەڵێت: ''ئێمە لە ڕاستیدا پێمان وایە یەکمان گرتووە، بەڵام کە ئەم جۆرە دۆخانە دێنە پێش، ئێمەش لێک دادەبڕێین. کاتێک سەیری ئەم فیلمە دەکەیت دەتوانیت سیاسییانە یان کۆمەڵایەتییانە خوێندنەوەی بۆ بکەیت، ئێمەش باسی لایەنی بەرپرسیارێتی دەکەین، لەبارەی ئەوەی کە کەسێک کەی و لە کوێدا هەڵدەبژێرێت بەرپرسیاری هەڵبگرێت.''

*
فیلمی کوێری

لە دەرهێنانی فێرناندۆ مێریلیس

ئەم فیلمە لە چوارچێوەی پڕۆژەی پێکەوە بۆ بینینی فیلم نمایش دەکرێت و دوابەدوای بینینی بینەرانی گفتوگۆ دەربارەی دەکەن

ڕۆژ: سێشەممە، ٥\٩\٢٠١٧

کات: ٢:٠٠ی پاشنیوەڕۆ

شوێن: سینەما سالم

نرخی بلیت: ٣٠٠٠ دینار

ژێرنووسکردنی بۆ کوردی: هەڵۆ فەریق

وەرن پێکەوە ئەم فیلمەی ڕۆحی ئەزەلیی ستەمکاری و چەوسێنەریی مرۆڤمان لە خراپترین دۆخەکانیدا پیشان دەدات، ببینین و دوابەدوای بینینی گفتوگۆ دەربارەی بکەین

ناونیشانی سینەما سالم:

شاڕێی سالم، تەلاری چاپخانەی سەردەم، نهۆمی دووەم