پێکەوە بۆ بینینی فیلم: هێزی بەرەنگاریی ئەدەب و هونەر و ژیان لە بەرانبەر ستەمکاریدا

گێرد ویزلەر ئەفسەرێکی دەوڵەتیی سیستماتیکە، یاسا و ڕێساکانی دەوڵەت و دابونەریتەکانی لە تەواوی ژیانیدا ڕۆ چوون و تەنانەت لە حاڵەتە زۆر تایبەتییەکانی ژیانیدا پێیانەوە پابەندە: هەرگیز قۆپچەی سەری سەرەوەی کراسەکەی ناکاتەوە، تەنانەت لە کاتی سێکسیشدا، قەت بۆینباخەکەی خوار نییە، هەمیشە زنجیری چاکەتەکەی داخراوە و ڕێکپۆشە، ڕێوڕۆشتنی وێنەی ڕۆبۆتە، هەرگیز خەندەیەک لەسەر لێوی نییە، لە کاتی کارەکەیدا لارولەوێرییەکی لێ نابینرێت و هەمیشە بەندەی سیستمە. ویزلەر بۆ چاودێریکردنی گیۆرگ درایمانی ئەدیب و هونەرمەند ڕادەسپێردرێت.

گیۆرگ درایمەن شانۆنامەنووسە، پیانۆژەنە و پیاوێکی خۆشمەشرەبە، هاوژینەکەی لە ڕادەبەدەر خۆش دەوێت و زۆرینەی کاتەکان سەرجێیی ئەویندارانە دەکەن، خەباتگێڕە و چەپێکی ڕاستەقینەیە: هەمیشە قۆپچەی سەری سەرەوەی کراسەکەی کراوەتەوە و هەرگیز بۆینباخی نەبەستووە، بۆ بۆنەیەک نەبێت، ڕێکردنی ئازادانە و خەباتگێڕانەیە، هەمیشە خەندەیەکی پڕژیان لەسەر لێویەتی، لە هەوڵی بەردەوامدایە بۆ دەرخستنی گڵاوییەکانی ستەمکارانی سیستمی وڵاتەکەی.

ویزلەر بێ ئەوەی بیەوێت ڕۆ دەچێتە ژیانە ئەدەبی و هونەری و خەباتگێڕییەکەی گیۆرگ درایمەن و هاوژینەکەیەوە: حەزی بە ئەوینکردنەکەیان دەبێت، دەچێتە کتێبخانەکەیان و کتێبێکی چەپانەی بێرتۆڵد برێخت دەبا و دەیخوێنێتەوە، بە گوێگرتن لە ژەنینی پیانۆکەیان دەست بە گریان دەکات، بە ویستی خەباتگێڕییان سەرسام دەبێت. هەموو ئەمانە و زیاتر وای لێ دەکەن لەبری ئەوەی ڕاپۆرتەکان بە دروست بۆ وەزارەت بنووسێت، پێچەوانە دەکات و تا پلەی تیاچوونی پۆستەکەی، یارمەتییانن دەدات.

بینینی ئەم فیلمە بۆ تێگەیشتن لە چاودێریی قووڵ و توندی دەسەڵاتی سیاسیی ستەمکار و زانینی ڕۆڵی ئەدەب و هونەر و خەباتگێڕی لە وەستاندنەوەی دژی ستەمکاری، پێویست و گرنگە.

*

ژیانی ئەوانی دیکە

لە دەرهێنانی فلۆریان هەنکڵ

ئەم فیلمە لە چوارچێوەی پڕۆژەی پێکەوە بۆ بینینی فیلم نمایش کرا و دوابەدوای بینینی بینەرانی گفتوگۆیان دەربارەی کرد