پێکەوە بۆ بینینی فیلم: ئەدەب و هونەر ئەفسەرێکی چاودێریکاری وەزارەت دەکەنە کەسێکی بەرەنگار

لە ئینگلیزییەوە: ساڤان ئاکۆ

ژیانی ئەوانی دیکە فیلمێکە چاومان بەرانبەر بە ستەمکاری و چاودێریی قووڵی ڕۆژانی کۆتایی دەسەڵاتی سیاسیی ئەڵمانیای ڕۆژئاوا دەکاتەوە. گیۆرگ درایمان شانۆنامەنووسێکی بەناوبانگە و هاوژینەکەی، ماریا زیلاند، کە لە شانۆییەکانیدا بەشدارە، ڕۆڵی سەرەکی دەبینن. درایمان هاووڵاتییەکی بۆهێمیایە کە ڕقی لە بەستنی بۆینباخە، بەڵام لە هەمان کاتدا بۆ بەهاکانی ئەڵمانیا بەوەفایە. ئەو چەندین ساڵ لە بەرانبەر دەسەڵاتی سیاسیی ستەمکار و چاودێری وڵاتەکەی لە هەوڵدا بووە بۆ گەیاندنی پەیامە هونەرییەکانی و هەمیشە لە بەرەنگاریدا بووە، بە جۆرێک کە هەرگیز نەیهێشتووە بەرهەمەکانی لە بڵاوکردنەوە و کردنی بە شانۆیی قەدەغە و سانسۆر بکرێن.

کاپتن گێرد ویزلەر دێتە ژیانی خۆی و هاوژینەکەیەوە،  کە ئەفسەرێکی چاودێری سەر بە وەزارەتی ناوخۆیە و تەواوی کون و کەلەبەری ماڵەکەی پڕ دەکات لە وایەر و ئامێری گەیەنەری دەنگی و بە هەورەبانی ئەپارتمانەکەیەوە دەبەستێت، تا گوێ لە هەر قسە و گفتوگۆیەکی دوو هاوژینەکە و میوانەکانیان بگرێت، بە مەبەستی دۆزینەوەی بەڵگەی ناپاکی و خیانەتی نیشتمانی. ئەمەش دوای ئەوە دێت کاتێک کار و بەرهەمەکانی گیۆرگ درایمەن بۆنی ناڕەزایی و بەرەنگاری و ڕووبەڕووبوونەوەی دەسەڵاتی سیاسیی لێ دێت.

ویزلەر هەمیشە ئەفسەرێکی جێی متمانەی وەزارەت و دەسەڵاتی سیاسی بووە و بە هۆی ئەوەی تەواوی ژیانی سیستماتیک و خزمەتکارێکی دەوڵەت بووە، تەنها بۆ کارە سەخت و قورسەکان هەڵبژێردراوە، بەڵام ژیانە ئەدەبی و هونەری و بەرەنگارانە و خەباتگێڕییەکەی دوو هاوژین و هاوڕێکیانیان، وای لێ دەکات بەرە بەرە کێش بێت بەرەو ئەو جۆرە ژیانە، کە ئیتر وای لێ دەکات پێچەوانەی ئەو کارەی پێی سپێردراوە، بکات: لەبری ڕاپۆرتدان لەسەر بەرەنگاری و خەباتەکەیان، دەڵێت کە تەنها خەریکی ژیانی ئاسایی خۆیانن. ئیتر دەکەوێتە دووڕیانێکی ئەخلاقییەوە، چونکە بە درێژایی ژیانی لە بەرانبەر باش جێبەجێکردنی ئەرکەکانی بۆ وەزارەت و دەوڵەت، هەمیشە شانازیی بە خۆیەوە کردووە، بەڵام ئیتر خەریکە وەک کارەکانی پێشووی هیچ چێژێک لەم ئەرکە پێسپێردراوەی نابینێت و بگرە دەبێتە بەشێک لەو خەباتەی دژ بە دەسەڵاتی سیاسییەکەی دەکرێت.

ئەفسەری بڕاوپێکراوی وەزارەت، چەندین سەعات لەو هەورەبانەدا گوێ لە شیعر و گفتوگۆی سیاسی و نرکە و ناڵەی ئەوینکردن و چی و چیی تری پڕژیان دەگرێت، کە هەرگیز پێشووتر لە ژیانی ئەمدا نەبووە و بگرە هەرگیز درکی پێ نەکردووە دەشێت ژیانێک هەبێت بەم جۆرە. ئیتر وای لێ دێت لە پەیوەندیی نێوان درایمان و زیلاند، درایمان و هاوڕێکانی، بەرەنگار و خەباتگێڕەکاندا دەتوێتەوە، لای ئەو چیتر ئەوان ئامانج نین بۆ دەستخستنی بەڵگەی ناپاکی و خیانەتی نیشتمانی، چیتر خۆیشی چاودێریکار و گوێگرێکی وەزارەت نییە ویزلەر هەست بە تامی ژیانیان دەکات، بەلای ئەوەوە ژیانی ئەوان، ژیانی خۆی و ئەوانی دیکە نییە.

*

ژیانی ئەوانی دیکە

لە دەرهێنانی فلۆریان هەنکڵ

ئەم فیلمە لە چوارچێوەی پڕۆژەی پێکەوە بۆ بینینی فیلم نمایش کرا و دوابەدوای بینینی بینەرانی گفتوگۆیان دەربارەی کرد