پێکەوە بۆ بینینی فیلم: گۆرانیی بەرەنگاریی نەتەوەیەک لەژێر مەترسیی توندڕەویی ئایینیدا

لە ئینگلیزییەوە: کانیاو سوعاد

فیلمی تیمبەکتو چیرۆکی شارێکی لێواری بیابانی ساحارایە لە مالی، کە پێیەکی بە زۆر خراوەتە ناو شەریعەتی ئیسلامی و پێیەکی تری لە ناو کەلتووری ڕەسەنی خۆی، ئەفریقای ڕۆژئاوادایە. ئەم فیلمە تایبەتمەندییەکی دەگمەنی هەیە، ئەویش بەکارهێنانی شەش زمانی جییاوازە تێیدا: فەڕەنسی، عەرەبی، بامبارایی، سۆنگایی، تاماشقی و ئینگلیزی. لەگەڵ ئەم پێکداکەوتنی زمان و دابونەریتانە، ئەم هەرێمە جێیەکە بۆ بوونی بە تەختەی شانۆییەکی تراژیدی؛ لە هەموو سەردەمەکاندا ئەوەی کە گرووپێک پەڕگیرانە چەکیان هەڵگرتووە و تەنها خۆیان بە ڕاست زانیوە و ئەوانی تریان سڕیوەتەوە، تراژیدیای دروست کردووە.

عەبدولڕەحمان سیساکۆی دەرهێنەر تیمبەکتۆی لە ساڵی ٢٠١٢دا دەرهێناوە، ئەو وەختەی شارەکە لە لایەن گرووپێکی جیهادیی ئیسلامییەوە دەستی بەسەردا گیرابوو و لە ڕێی بڵندگۆی مزگەوتەکانەوە جاڕیان دەدا کە سزای شەریعەت بەکار دەهێنن، وەک جەڵدلێدانی ئەو کەسانەی گۆرانی دەڵێن، یاری تۆپیپێ دەکەن، دەموچاو و دەست و قاچیان دیارە و زۆر شتی تر، کە هەموویان نیشانەی ژیاندۆستین.

خەڵکانی تیمبەکتو لە ململانێی ڕزگاربووندان لەژێر شەریعەتی کپکاری ئەم گرووپە ئیسلامییە توندڕەوە؛ پیاوان پێیان دەگوترێت پانتۆڵەکانتان درێژە و دەبێت کورتی بکەنەوە، ژنانی دڵخوازی ڕەنگ دەبێت هەموو کات جلوبەرگ و گۆرەویی ڕەش لەپێ بکەن، دەستکێش لەدەست بکەن و هەموو ڕوویان دابپۆشن، کە ئەمە وادەکات ماسیفرۆشێکی ژن تووڕە ببێت و بڵێت: ''چۆن دەتوانم ماسییەکان بگرم و بیانفرۆشم ئەگەر دەستکێشم لە دەستدا بێت؟!''
یەکێک لەو ئامڕازانەی کە دانیشتوانی تیمبەکتو بەرەنگاریی پێ دەکەن، عەشقە. کیدان و ساتیمان لە ژێر چادرێکدا و لەسەر تەپۆڵکەیەکی لمین و لە دەرەوەی شار، لەگەڵ کچەکەیان و کوڕێکی بێلانە دەژین، کە بە شوانکارییەوە خەریکن. دراوسێکانیان کاتێک موجاهیدەکان گەیشەتوونەتە ئەوێ، هەڵهاتوون یان کوژراون، بەڵام کیدان و خێزانەکەی لەوێ نەجووڵاون؛ کیدان لە ژێر تریفەی مانگی بیابانەکەدا هێمنانە گیتارەکەی دەژەنێت، ژنەکەی لەباوەش دەگرێت و بەردەوام دەڵێت: ''مەترسییەکان تێدەپەڕێنین.'' بەڵام لە هەمان کاتدا عەشق دەشبێتە ئامڕازێک بۆ جێبەجێکردنی سزا ستەمکارانەکانی گرووپە توندڕەوە ئیسلامییەکە، کاتێک لە یەکێک لە دیمەنەکاندا دوو عاشق لە تەنیشت یەکدا سەریان خراوەتە ژێر گڵ و بەردباران کراون، لەبەر ئەوەی پێش هاوسەرگیری سێکسیان کردووە.

موجاهیدەکان زۆربەیان پێشتر کەسانی خراپ و بەرباد بوون، ئێستاش بانگەشەی ''ڕزگارکردنی جیهان لە خراپە'' دەکەن. پێکەوە باسی زێدان و مێسی دەکەن، کەچی تۆپی پێ لەوانی دی قەدەغە دەکەن؛ لە یەکێک لە دیمەنەکاندا گەنجەکان بە شێوەیەکی فەنتازییانە یاری تۆپی پێ دەکەن، واتە بەبێ تۆپ، بەبێ تۆپ پاس دەدەن، شووت لێ دەدەن، گۆڵ دەکەن. ئەمە پاش ئەوە دێت کە گەنجێک لەسەر تۆپی پێ جەڵدی لێ دەدرێت.

یەکێکی تر لە ستەمکارییەکانی ئەم گرووپە پەڕگیرە ئیسلامییە، قەدەغەکردن و نەهێشتنی موزیکە، کە لە تیمبەکتودا ڕۆڵێکی گرنگی هەیە. لە شەقامەکانەوە دەنگی گۆرانی و موزیک دەبیسترێت؛ دیاوارا بە شێوەیەکی جوان و چێژبەخشانە لەگەڵ هاوڕێیانی گۆرانی دەڵێت، بەڵام دواتر هەشتا جەڵدی لێ دەدرێت. پاش جێبەجێکردنی سزاکەی، وەڵامی ئەم خانمە دەنگخۆش و ژیانویستە دەنگێکە، کە هەم هاواری ئازار و هەم سروودێکی شۆڕشگێڕانەیە، دژی هەموو ئەو ناشیرینی و مەرگدۆستییەی لە دنیای ئەمڕۆدا گرووپە ئیسلامییە توندڕەوەکان وەک ژەهر بڵاوی دەکەنەوە.
*

فیلمی تیمبەکتو

لە دەرهێنانی عەبدولڕەحمان سیسۆکۆ

ئەم فیلمە لە چوارچێوەی پڕۆژەی پێکەوە بۆ بینینی فیلم نمایش دەکرێت و دوابەدوای بینینی لە لایەن بینەرانیەوە گفتوگۆ دەربارەی دەکرێت

ڕۆژ: سێشەممە، ٢٩\٨\٢٠١٧

کات: ٢:٠٠ی پاشنیوەڕۆ

شوێن: سینەما سالم

نرخی بلیت: ٣٠٠٠ دینار

ژێرنووسکردنی بۆ کوردی: ئاوات کەریم

وەرن پێکەوە ئەم فیلمەی تێیدا وێنەی دەسەڵاتدارێتیی گرووپێکی ئایینیی توندڕەو و پەڕگیری تێدایە ببینین و دوابەدوای بینینی، گفتوگۆ دەربارەی بکەین

ناونیشانی سینەما سالم:

شاڕێی سالم، تەلاری چاپخانەی سەردەم، نهۆمی دووەم