پێکەوە بۆ بینینی فیلم: ٣ گەمژەی بلیمەت

لە ئینگلیزییەوە: ساڤان ئاکۆ

٣ گەمژەکە بە تەنها چیرۆکی سێ خوێندکاری زانکۆ نییە، بەڵکو چیرۆکی هەر مرۆڤێکی سەر ئەم زەمینەیە کە ڕێگری لە هێنانەدیی خەون و خولیاکانی دەکرێت. فیلمەکە ئەو بەربەرەکانێیانەی ژیان وێنا دەکات کە دەبێت مرۆڤ بەرەنگاریان ببێتەوە.

دیمەنێک لە فیلمەکەدا هەیە کە تێیدا فەرحان دەڵێت لەو ساتەوەی چاوم بە دنیا هەڵهێنا، باوکم بڕیاری دابوو کە کوڕەکەی دەبێتە ئەندازیار: ئەندازیار فەرهان کورێشی. فیلمەکە بە شێوەیەکی کاریگەرانە کێشەی دایکان و باوکان دەردەخات، کە زۆر لە منداڵەکانیان دەکەن ئەوە هەڵببژێرن کە ویست و ئارەزووی خۆیان نییە و وایان لێ دەکەن خولیاکانی خۆیان لەبیر بکەن و پشتگوێی بخەن، کە ڕەنگە خولیاکانی خۆیان بیانگەیەنێتە سەرکەوتن و ئاستی بەرز. ئەم دۆخە لەگەڵ فەرحاندا ڕوو دەدات، کە دەیەوێت ببێت بە فۆتۆگرافەرێکی ئازاد. ئەو هەرگیز لە خوێندنی ئەندازیاریدا باش نەبوو، بەڵام هەر کە کاری لە بواری خولیاکەی خۆیدا کرد، بێ ئاوڕدانەوە سەرکەوتنی بەرچاوی بەدەست هێنا.لەلایەکی دیکەوە ڕاجوو نمایندەی پۆلێک لە خوێندکار دەکات کە لەژێر بارگرانی و هەژاریی خێزانەکەیدا لە کەوتن دەترسن، ئەمەش وادەکات بڕوابەخۆبوونیان لەدەست بدەن و بەرەو کەوتنیان ببات. ئەم ترسە لە کەوتن زۆر جار ناچاریان دەکات هەنگاوی پەڕگیرانە بدەن، وەک ئەوەی لەگەڵ ڕاجوودا ڕوو دەدات، کە هەوڵ دەدات کۆتایی بە ژیانی خۆی بێنێت. بەڵام لەگەڵ ئەوەی دووبارە متمانەبەخۆبوونی بەدەست دەهێنێتەوە، لە هەر هەوڵدانێکیدا سەرکەوتن بەدەست دەهێنێت.

ڕانچۆ سێینەی ئەم سێ هاوڕێیە دروست دەکات، کە ئەو جیاواز لە دوو هاوڕێیەکی، خوێندکارێکی زیرەکە و حەزی بە بەشەکەیەتی، بەڵام سیستم و پەیڕەوی خوێندنی زانکۆ و بەشەکەیی پێ باش نییە و لەگەڵ ویستە نوێخوازانەکانی ئەودا یەک ناگرنەوە، هەر بۆیە هەمیشە لە بەرەنگاری و ڕووبەڕووبوونەوەی مامۆستایان و بەڕێوەبەرانی سیستمەکەدا دەبێت، ئەمەش وادەکات هەمیشە سەرزەنشت بکرێت و دوور بخرێتەوە.

سێ گەمژەکە فیلمێکی کۆمێدییە دەربارەی سێ هاوڕێی زانکۆ، کە لەگەڵ خاڵی ناوەڕۆک و سەرەکیی فیلمەکەدام کە سەربەخۆیی خودە، هێشتا نەیانهێشتووە لایەنی چێژ و پێکەنین لە فیلمەکە ون ببێت. ئەم فیلمە پێوەری نوێی هاوڕیێیەتی و پەیمانی هاوبەش لە نێوان هاوڕێ خوێندکارەکاندا دروست دەکات، کە هەر لە سەرەتای فیلمەکەدا ئەوەمان بۆ ڕوون دەبێتەوە، کاتێک ڕانچۆ لە دیالۆگێکدا دەڵێت: ''زانست و زانیاری زۆر لە چواردەورماندا هەڵدەقوڵێن، لەدەستی مەدە، لە هەر کوێوە دەستت پێی گەیشت چنگی پێدا بکە.''

فیلمەکە کۆمەڵێک دیالۆگی گرنگ و پڕوانە لەخۆ دەگرێت، کە یارمەتیدەر و هاندەر دەبن و بۆ گشت هەنگاوەکانی ژیان لەگەڵمان دەمێننەوە.
*

ئەم فیلمە لە چوارچێوەی پڕۆژەی پێکەوە بۆ بینینی فیلم نمایش کرا و دوابەدوای بینینی لە لایەن بینەرانیەوە گفتوگۆ دەربارەی کرا