بەیاننامەی ڕاگەیاندنی پڕۆژەی پێکەوە بۆ بینینی فیلم

 دنیای ئەمڕۆی ئێمە دنیای جەنگە، دنیای پووچێتییە، دنیای بەیەکداچوونی بیروڕا جیاوازەکان و دنیای نائومێدییە قووڵەکانە. جەنگ تەنها بە مانا کردەییەکەی نا، بەو مانایە نا کە تێیدا چەک ڕۆڵی سەرەکی دەبینێت، بەڵکو هاوکات لەگەڵ ئەوەدا جەنگە کولتوورییەکانیش، ئەو جەنگانەی کە لە دەرەنجامی شەڕی بیروڕاکان پووچێتیی بەرهەم هێناوە و بووەتە هۆی ئەوەی لە کۆی جومگەکانی کۆمەڵگەدا، زۆر قووڵ نائومێدی ڕۆ بچێت.

بۆ ڕووبەڕووبوونەوەی ئەم جەنگانە، بۆ بەرەنگاریکردنیان و بۆ ئەوەی بتوانین بمێنینەوە، پێویستمان بە ئامادەباشییەکی زۆر و سەنگەرلێدانێکی وریایانە هەیە، تا لە ڕێیەوە بناغەی ئەو گۆڕانکارییە دابنرێت، کە دەمێکە ئاواتمانە. ئەو ئاواتەی دیدگاکەی بەرهەمهێنانی کۆمەڵگەیەکی تەندروست و شارستانی و ئاسۆی نەوەیەکی هۆشیار و بەرپرسی هەیە و بە کارکردنی زۆر و بەردەوام بەدی دێت.

بە بڕوای ئێمە، باشترین کایەیەک کە بتوانرێت لە ڕێیەوە ئەم ئاواتە بەم دیدگا و ئاسۆیەوە بەدی بهێنێت، هەروەها بناغەیەکی پتەو و ڕۆچووی بۆ بەرهەم بهێنێت، کایەی کولتوورە. کایەی کولتوور بە هەریەکێک لە بەشە جیاوازەکانیەوە، ئەو کایەیە کە دەتوانێت کاریگەری لەسەر کۆی کایەکان دابنێت و دەکرێت بڵێین لە بنەڕەتدا، هەر خۆی سەرچاوەی کۆی پارادایمی کایەکانی ترە. هەر بۆیە کارکردن لە کولتووردا بە ئامانجی کردنی ئەو جەنگە و بەدیهێنانی ئەو ئاواتە، دەشێت یەکێک لە ڕێگەکانی مانەوەمان لە دنیای ئەمڕۆدا بێت.

سینەما بەشێکی گرنگی ئەم کایە گرنگەیە، کۆڵەکەی سەرەکییەتی و ئەو چاوەیە، کە لە ڕێیەوە دەتوانین کولتووری کۆمەڵگە جیاوازەکانی پێ ببینین. لەمێژە لەگەڵ سەرهەڵدانی لە هەر کوچەیەکی دنیادا، سینەما دەبێتە بەشێکی گرنگ لە شوناسی مەعریفی و بیرکردنەوەی ئەوان. هەروەها سەردانی مۆڵگە سینەماییەکان بە شێوەیەکی گشتی و بینینی فیلمی سینەمایی لە هەر جێگەیەک بەتایبەتی، بەشێکی گرنگتری ئەم بەشە گرنگەی کایەی کولتوورە، کە دیسان خەیاڵ و بیرکردنەوە و دنیابینی بۆ کۆمەڵگەی خاوەن سینەما و بینەر دروست دەکات.

لەم سۆنگەیەوە، ئێمە لە ئێستادا و هاوکات لەگەڵ ئەو بارودۆخە ناهەموارە سیاسی، ئابووری، کۆمەڵایەتی، دەروونی و لە سەرووشیانەوە، کولتوورییەی دەگوزەرێت، پڕۆژەیەکی درێژخایەن بۆ بینینی فیلمە گرنگەکانی دنیا و گفتوگۆکردن دەربارەیان سەرپێ دەخەین.ئەم پڕۆژەیە لە بینینی هەفتانەی ئەو فیلمانەی سینەمای جیهانی پێک دێت، کە بە جۆرێک لە جۆرەکان بینینیان بۆ تەواوی تاکەکان بەگشتی و بۆ نەوەی نوێی ئەمڕۆ بەتایبەتی گرنگن و بۆ دروستکردنی خەیاڵ و بیرکردنەوە و دنیابینی بەرانبەر کۆی سیستمی سیاسی، ئابووری، کۆمەڵایەتی، دەروونی و کولتووریی ئێمە، پێویستن. هەروەها ڕاستەوخۆ گفتوگۆکردن دەربارەی بابەت و تێما سەرەکییەکانی فیلمەکان دوای بینیان، بەشێکی گرنگتری ئەم پڕۆژەیەیە و لە ڕێیەوە هەوڵ دەدەین دیالۆگ و ڕاگۆڕینەوەی هەرەوەزی بۆ قسەکردن لەسەر کۆژانەکانمان دروست بکەین و بتوانین لەم ڕیگەیەوە، ڕای گشتی بەرهەم بهێنین، تا ئەو دیوارە پۆڵایینەی لە نێوان بینەر و سینەما لە کۆمەڵگەی ئێمەدا هەیە و پاساوی جیا جیای بۆ دەهێنرێتەوە، بەرەو نەمان بچێت و ئەو شوناسە هەقیقییەی سینەما هەیەتی، کە کۆمەڵایەتیبوون و بەدەرنەبوونە لە گشت، بگەڕێتەوە.

لیژنەیەکی ڕێکخراو بە خوێندنەوەی کۆی دۆخی ئەمڕۆمان و تاوتوێکردنی ئەو فیلمانەی لەگەڵ ئامانجی پڕۆژەکەدا دێنەوە، خشتەی نماییشی فیلمەکانی ئەم پڕۆژەیە هەڵدەبژێرن و تەواویان بە ژێرنووسی کوردی و کوالێتیی بەرز نماییش دەکرێن. هەروەها دەرگەی لیژنەکە بۆ هەر دڵسۆزێک کراوەیە، کە پێی وابێت دەتوانێت ڕای ڕاوێژکاریی پێ بدات و بەشدار بێت لە سەرپێخستنی پڕۆژەکە و بەردەوامیدان پێی.

پێکەوە بینینی فیلم لە سینەما و گفتوگۆکردن دەربارەی، شتێکی ترە.

سینەما سالم

کۆمەڵەی ٦٨

٢٧\٤\٢٠١٧