پێکەوە بۆ بینینی فیلم: ژوور، مانیفێستی ئازادی

لە ئینگلیزییەوە: کانیاو سوعاد

ژوور چیرۆکی کوڕێکی ئازای پێنجساڵان دەگێڕێتەوە، کە لە لایەن دایکە دڵسۆزکەیەوە چاودێری دەکرێت. وەک هەر دایکێکی تری باش، ژیانی خۆی بۆ خۆشبەختی و سەلامەتیی کوڕەکەی تەرخان کردووە، بە خۆشەویستییەکی زۆرەوە پەروەردەیەکی باشی دەکات و هەر شتێکی بۆ دەکات، کە دایکانی تر دەیکەن. کەچی ژیانیان هەموو شتێکە، بەڵام ئاسایی نییە؛ لە ژوورێکی دە بە دە پێییدا بەند کراون، کە جۆیی دایک بە دەربڕینێکی جوان ناوی ناوە ''ژوور''.

پێش حەوت ساڵ، نیکی پیر، جۆی نیوسەم دەفڕێنێت و لە ژوورێک کە بۆ عەمبارکردنی شتە زیادەکانە، لە ماڵەکەیدا بەندی دەکات. هەر جارێک نیکی پیر بۆ سێکسکردن سەردانی ''ژوور'' دەکات، جۆی ناهێڵێت جاکی کوڕی بیبینێت، یان بە پێچەوانەوە، بەڵکو بە خەوتوویی لە کەنتۆرەکەدا دەیشارێتەوە. ئیتر نیکی پیریش چیتر باکی بە زانین دەربارەی کوڕە بایۆلۆجییەکەی نییە.

جۆی هەموو گەردوونی لە ''ژوور''دا بۆ جاک دروست کردووە، بە شێوەیەک کە تەنانەت لەو ژینگە خراپەشدا جاک دەتوانێت ژیانێکی پڕئومێد بژی. ''ژوور'' تەلەڤیزیۆنێکی تێدایە، کە جاک زۆر بە خۆشحاڵییەوە تەماشای دەکات، هەر شتێکیش بەدەر لە ژینگەکەی بوونی هەبێت، بۆ ئەم تەنها لە تەلەڤیزیۆندا بوونی هەیە. جۆی بۆ ئەوەی جاک لە هەموو شتێک بپارێزێت، ئەوە لە جاک دەگەیەنێت کە خۆیان و نیکی پیر، تاکە شتی ڕاستەقینەن لەسەر ئەم زەوییە دەژین و ئەوەی جاک لە کتێبەکان دەیخوێنێتەوە و لە تەلەڤیزیۆن دەیبینێت، ڕاستی نییە. تاکە بینین و سەرنجی ڕاستەقینەی جاک بۆ دنیای دەرەوە، لە بۆشاییەکی بچووکی بنمیچی ''ژوور''ەوەیە، کە ڕووناکیی ئاسمانی بە ڕۆژ و شەو تێدایە و دەیبینێت.

جۆی لە ماوەی ئەو حەوت ساڵەدا جارێک هەوڵی هەڵهاتنی داوە و کاتێک شکستی هێناوە، بووەتە هۆی ئەوەی کە چیتر هەوڵ نەداتەوە، بەڵام ئێستا لەبەر ئەوەی تەمەنی جاک گەیشتووەتە تەمەنێک کە بەرە بەرە باشتر لە شتەکان تێدەگات و بە بیرکردنەوە لەوەی کە ئەگەر شتێک بەسەر نیکی پیردا بێت، ئەمان بۆ هەمیشە لە ''ژوور''دا بەند دەبن، دووبارە بیر لە هەوڵێکی تری هەڵهاتن دەکاتەوە.

پاش ئەوەی پلانەکەیان سەردەگرێت، تەنها بۆ جاک زەحمەت نابێت خۆی لەگەڵ ئەو دنیا نوێیەدا بگونجێنێت، کە هیچ تێگەیشتنێکی بۆی نییە، بەڵکو بۆ جۆییش لەوە زەحمەتتر دەبێت کە وێنای دەکات و دەبێت لەگەڵی بگونجێت، ئەمەش تەنها هۆکارەکەی بۆ ئەو گۆڕانانە ناگەڕێتەوە کە حەوت ساڵە ڕوویان داوە و ئەم تێیاندا بەشدار نییە، بەڵام بە زیاتر گەورەبوونی جاک و ڕاهتنی لەگەڵ دنیا نوێیەکەیدا و دەربازبوونی و پەیداکردنی هاوڕێ، جۆییش لەوە تێدەگات کە دەبێت لەگەڵیدا ڕابێت و ژیانی پێک بهێنێتەوە، تا ئامادەیی بەهێزی هەمیشە بۆ کوڕە ئازاکەی هەبێت.ژوور سەرنجە دەگمەنەکەی ژیانمان لە لاکەی تری ئەزموونێکی ڕاتەکێنەوە پیشان دەدات؛ ڕێگای دوورودرێژی چاکبوونەوەی دەروونی و هەستیمان پیشان دەدات. وەختێک ئیتر بینینەوەی جۆی لەگەڵ دایکوباوکی کۆتایی هاتووە، کە ئیتر فرمێسکی شادی و باوەش و ماچەکەن لەناو چوون.

*

ئەم فیلمە لە چوارچێوەی پڕۆژەی پێکەوە بۆ بینینی فیلم لە سینەما سالم نمایش کرا و دوابەدوای بینینی لە لایەن بینەرانەوە گفتوگۆ دەربارەی کرا