پێکەوە بۆ بینینی فیلم: فیلمی من، دانیەڵ بلەیک، هاواری چینی ستەملێکراوانە و دەبێت ببیسترێت و بینرێت

لە ئینگلیزییەوە: کانیاو سوعاد

ئەگەر فیلم ئاوێنەی کۆمەڵگە بێت، ئەوا فیلمەکانی ئەم دواییانەی سینەمای پەیامدار، کە دەربارەی ناشیرینییەکانی سیستمی سەرمایەداری و قەیرانەکانین، ڕەنگدانەوەیەکی تەواوی ئەو وێرانکارییانەن کە ناویەتییەوە. زۆربەیان دەربارەی هەژاریی چینی ستەملێکراوانن و بەدوای شکستی مرۆڤایەتی لە بەرانبەر ئەو چینەدا دەگەڕێن. فیلمی من، دانیەڵ بلەیکیش فیلمێکە لەو جۆرانە. ئەم فیلمە وێنەیەکی بەهێزی پیاوێکی ئاساییە، کە لە جیهانێکی ئۆروێڵیانەدا تێدەکۆشێت شکۆی خۆی بپارێزێت: دوور لە ئاسوودەیی، کاڵ و لمین و دڵڕەقانەیە.

دانیەڵ بلەیک پیاوێکی کرێکاری کەمدوو، بەڵام خۆشەویستی پەنجاونۆساڵانی خەڵکی نیوکاسڵی ئینگلتەرایە. لە جەڵتەیەکی دڵی سەخت ڕزگاری بووە و بە تەنیا دەژی. توانای کارکردنی نییە، بەڵام ئەو شتە دەکات کە هەزارانی تری وەک ئەم لە حاڵەتێکی وادا دەیکەن: داوای لە فەرمانگەی چاودێری تۆمار کردووە بۆ بیمەی تەندروستی، بۆ ئەوەی خەرجییەکانی پێ تەواو بکات، تا ئەو کاتەی تەندروستیی باش دەبێتەوە. ئەوەی پاش ئەمە ڕوو دەدات، ئەوەیە کە لە بەشی پشتگیریی فەرمانگەکە، کارمەندەکانی هەموو خۆیان دەبوێرن لە بەرپرسیارێتییەکانیان، بە بیانووی ئەوەی کە دەسەڵات بەدەست بڕیاردەرەکەیە. دواجار دان پشتگیری ناکرێت و هەموو ڕێگەکانی ناڕەزاییدەربڕینیشی لێ گیراوە.

لە ناوەڕاستی چارەسەری نامرۆییانەی سیستمی بێگیانەوە، دانیەڵ هەوڵ دەدات یارمەتیی دایکێکی تەنیا، کاتی، لەگەڵ دوو منداڵەکەی بدات، کە ئەوانیش بەم سیستمە تێک شکێندراون. کە دان بێهیوا دەبێت لە یارمەتیدانی کاتی، دەچێت ناڕەزایی خۆی لە ڕێگەی نووسینی چەند دروشمێکەوە لەسەر دیواری فەرمانگەی چاودێری دەردەبڕێت، کە لە ماوەیەکی نزیکدا ئەوە دەیکات بە پاڵەوانی شار.

ئەم فیلمە وەڕزکەر و بەرەنگارانەیە بۆ ئەوانەی پێیان وایە لە کۆمەڵگەیەکدا دەژین، کە سیستمەکەی یارمەتیدەری چینی ستەملێکراوانە، کاتێک پێویستیان بە یارمەتی هەیە. هەنگاوەکانی خاون و دیالۆگەکانیش ڕەق، بەڵام ژیان خۆی بەم جۆرەیە و فیلمەکەش هەر وا مانیفێستی دەکاتەوە. دوو ئەکتەرە سەرەکییەکە ڕۆڵەکانیان پڕ کردووە لە دەنگی ڕاستەقینەی بێشوماری چینی ستەملێکراوان، کە هەردەم ڕووبەڕووی ساتە سەختەکان دەبنەوە. هیچ خۆشییەک لە فیلمەکەدا نییە و هەر گاڵتەیەکیش تێیدا بێت، بۆ ئەوەیە بەرگەی بگریت. بەڵام بۆ جیهانێکی وا، کە بێبەزەییانە ڕووبەڕووی چینی ستەملێکراوان دەبێتەوە، ئەم فیلمە هاواری ئەو چینەیە و دەبێت ببیسترێت و ببینرێت. 

*

ئەم فیلمە لە چوارچێوەی پڕۆژەی پێکەوە بۆ بینینی فیلم لە سینەما سالم نمایش کرا و دوابەدوای بینینی لە لایەن بینەرانەوە گفتوگۆ دەربارەی کرا