شاجوانە ناشیرینەکان: پووچبوون دەتکاتە شاجوان

 دامەزراوەیەکی گەورە هەیە: پانتاییەکی فراوان، کۆمەڵێک بەشی جۆراوجۆر، بواری زۆر و جیاجیای هەن، کە تێیدا دەتوانیت وزەی گەنجانەت و هێزی خوێندکاربوونت پەخش بکەیت، بە بارتەقای گەورەیی و پانتایی و جۆراوجۆری و زۆری و جیاییەکەی، کاریگەری دروست بکەیت. تۆ لەم پانتاییە فراوانەدا هیچ نیت، لە هەر یەکێک لە بەشە جۆراوجۆرەکانیدا غەرقی نەزانیت، زیادەی هەموو بوارەکانیت: لەم دامەزراوەیەدا بوونت پووچییە.

بەم هەموو کێم و جەراعەتەی هەتن، بەم هەموو بۆشییەی بۆشاییت پێ داگیر کردوون، بە زیادەییتەوە، ناچاریت شتێک بکەیت، ناچاریت بۆ ئەوەی بەوانی تر بڵێیت هەم، بڵێیت هێشتا توانای شتێکم هەیە، هێشتا لە جیهاندا شوێنێک بۆ من هەیە، دێیت دەچیتە پێشبڕکێوە، دەبیتە پێشبڕکێکار: بۆ مەعریفە و بەرەنگاربوون نا، بۆ بوون بە شاجوان.

تۆ خۆت قوربانیت، خۆت ستەمدیدەیت، بەرهەمێکی خراپ و ناشیرینی ئەم سیستمەیت، کەچی لە جێی ئەوەی بیر بکەیتەوە، دژی بجەنگیت، بەرەنگاریی بکەیت، هاواری گەرووت بۆ ماف و ئازادییە خوراوەکانت بەرز بکەیتەوە، هاوڕێ و هاوپشتی خوێندکارە قوربانی و ستەمدیدەکانی تر بیت، دێیت جارێکی تر دەبیتە بەشێک لەو سیستمە داڕزاوە و بەرهەمی دەهێنیتەوە. خۆت دەکەیت بە مادەی، بە شمەکی، بە کاڵای، لەبری بارکۆد ژمارە لەسەر خۆت دادەنێت (١، ٢، ٣، ٤):''کاممان جوانترین؟''

هاوڕێکەت یەکشەممە دێتە دەوام، سێشەممە لەبەر بێپارەیی دەڕواتەوە، بەشەناوخۆییەکەی سووتاوە، سەد هەزار دیناری لێ دەسەنرێت، کۆلێژ بە کۆلێژ ڕێپوان بۆ مافەکانی دەکات، پێکەوە هەموو سەرۆک و وەزیر عەمید و مامۆستاکان ئیرادەتان ژێرپێ دەخەن، سووکایەتیتان پێ دەکەن، کەرامەتتان دەشکێنن، جەهلتان دەرخوارد دەدەن، کەچی لەبری ئەوەی هاوچین و هاوخەباتی بیت، لەگەڵی لە ڕیزی یەکەمی ڕێپوان و ناڕەزاییدەربڕینەکان بیت، لەبری ئەوەی پێکەوە دەست بکەن بە چاوی هەموو ئەوانەی مرۆڤبوونتان لێ دەسێننەوە، دێیت دەڵێیت: ''ئەها لەوان جوانترم!''

پووچبوونتان ئێوەی خستە ئەم پێشبڕکێیەوە، ئێوەی بە یارمەتیی ساڵۆنە پڕ سووراو و سپیاوەکان و میدیا سێبەرە بەدئەخلاقەکان کردە شاجوان، بوونە کارەساتێکی تر لەو کارەساتانەی لە زانکۆ و پەیمانگەکانماندا دەگوزەرێت، بوونە مەرگەساتێکی تر، تراژیدیایەکی تر؛ لە کاتێکدا دەبوو گۆڕانکاری بوونایە.