پێکەوە بۆ بینینی فیلم: لالەنگی، فیلمێک بۆ هەڵوەشاندنەوەی دەستەواژەکانی دۆست و دوژمن

لە ئینگلیزییەوە: ساڤان ئاکۆ

ئیڤۆ پیرەپیاوێکی کەمدووی ڕیش زیوینە، کاری دروستکردنی سەبەتەیە بۆ لالەنگییەکانی مارگوسی دراوسێی. هەردووکیان کۆتا هاووڵاتییەکانی ئیستۆنیان، کە لە یەکێتیی سۆڤێتی پێشوو، لە جۆرجیا، لە ماوەی جەنگی ١٩٩٢ی هەرێمی ئەبخازیادا لەو ناوچەیە مابێتنەوە.

ئەو کێوەی ئیڤۆ و مارگوسی لێ دەژین جێیەکی کۆن و بێدەنگە و ڕیتمێکی لادێیانەی هەیە، کاتێک جەنگی لێ دەست پێ کرد، خێزانەکانیان گەڕاونەتەوە بۆ ئیستۆنیا، بەڵام ئەمان ماونەتەوە. هێمنیی ناوچەکەیان لە نێوان سەربازانی جۆرجیا و چیچان، کە لەپێناو بەشی پشتەوەی ئەبخازیای جیاکراوە دەجەنگن، شێواوە.

دوو سەرباز، کە هەریەک هیی لایەنێکی جەنگەکەن، بریندارن و ناچارن لەوەی کە ئیڤۆ هێناوینیەتە ماڵەکەی خۆی، سوود ببینن. ئەحمەد، سەربازە چیچانییەکە، سوێند دەخوات بە زووترین کات، کەی بۆی ڕەخسا، نیکۆی جۆرجیایی بکوژێت، بەڵام بەڵێن بە ئیڤۆ دەدات کە لە ماڵەکەی ئەودا ئەو کارە ناکات، نیکاش بە قسە ئیستیفسازییەکانی، هەمیشە تووڕەتری دەکات. هەردووکیان ماوەیەکی پڕ گرژی تێدەپەڕێنن و تیایدا هەمیشە بە چاوێکی دووژمنکارانەوە لە یەکتر دەڕوانن، مارگوسیش بەردەوام بەو دۆخەی لالەنگییەکانی تێیدایە، تووڕە و خەمبارە. لەم سێگۆشەیەدا ئیڤۆ بە مۆڕە و گرژی و گفتوگۆ سادەکانیەوە، هێمنیان دەکاتەوە.

بینەران لە کاتی بینینی فیلمەکەدا لە بیرکردنەوەی سەیری مرۆڤ بۆ جەنگ و شەرەف تێڕادەمێنن؛ ئەحمەد سوێندی خواردووە کە دوژمنەکەی بکوژێت، نیکاش، کە دوژمنەکەیەتی، هەر هەمان نیازی هەیە و هەمیشە سووکایەتی بە ئەحمەد دەکات، بەڵام دوای ئەوەی بۆ ماوەیەک لە ژێر یەک بنمیچدا دەبن و ئیڤۆ لە کاتی تووڕەبوونەکانیاندا بە ڕستەی سادە و ساکار وەڵامیان دەداتەوە و دەیانوەستێنێت، لەپڕ لە کاتی هێرشێکدا بەرگری لە یەک دەکەن و وەک دوو هاوڕێی گیانیبەگیانی، بۆ یەک دەجەنگن.

لالەنگی فیلمێکی سەیرە، زۆر سادە دەیەوێت پێمان بڵێت ئەو وێنایانەی بۆ دەستەواژەکانی دۆست و دوژمن هەڵمان بژاردوون، لە بنەڕەتەوە هەڵەن و مرۆڤ هەر لەخۆیەوە دای تاشیون، تەنها بۆ ئەوەی یەکتر بسڕنەوە و یەکێکیان سەروەر بن، بەڵام بێئاگان لەوەی کە زۆر شتی سادە هەن دەتوانن وا لە مرۆڤ دەکەن لە سەختترین حاڵەتەکان و ئەوەی پێی دەوترێت جەنگ، هاوڕێیەکی گیانیبەگیانی بن.

*

ئەم فیلمە لە چوارچێوەی پڕۆژەی پێکەوە بۆ بینینی فیلم نمایش کرا و و دوابەدوای بینینی لە لایەن بینەرانیەوە گفتوگۆ دەربارەی کرا