شاجوانە ناشیرینەکان: چاوەڕوان بووین ستەمکاران بخەیتە گێژاوەوە، نەک بەرهەمهێنەرەوەیان بیت

بۆ شوان عەتوف

دەمێکە دەتناسین، هەمیشە جیاوازیت ئامڕازی ناسینەوەت بووە، گەنجانە بیرت کردووەتەوە و کارت کردووە، بەتایبەت بەم دواییانە، کە بەگشتی پاڵپشتی گەنجان و بەتایبەت هیی ئێمەی خوێندکاران بوویت. بەشێکی باش لە کارەکانت ئەوانەن کە ڕۆحی ئێمە تینووی بوون، ویستوویانە تا گوڕوتینی گەنجانە و بەرەنگارانە تێیاندا گەشە بکاتەوە: ئەو فیلمەی تێیدا دەرهێنەرێک پێویستی بە لەمسی ئەکتەرەکانیەتی، گێژاوی چیرۆکی ئەبەدیی ئێمە، عاشقەکەی ڕۆمی، مەنەلۆگەکانی تەپڵ و بەرد، ئەو نامەیەی بۆ گەنجانی کۆچبەرت نووسی.

چاوەڕوانی زیاتر بووین، پاڵپشتیی زۆرترمان دەویست، تینووتر لە جاران بووین و گوڕوتینێکی باڵاترمان پێویست بوو، بەتایبەت بۆ ئێستا، کە دەکرێت بە ستەملێکراوترین توێژی کۆمەڵگە ناو ببرێین. لەبری ئەوەی لە ئێستادا دوایین دەرکەوتنت بۆ ئێمە بێت، بۆ خەمەکانمان، دژ بە ستەمکارییەکانی بەرانبەرمان، بۆ ماف و ئازادییە ژێرپێخراوەکانمان بێت، بەڵام بۆ ئەوە نەبوو: ئەو سیستمەی زۆرینەی دیالۆگی کارەکانت دژی بوون، هەمیشە بە بێمەعریفە و کوژەری ڕۆحییەتی شۆڕشگێڕی و دواکەوتووت دەزانی، هێنایتی و لە سینەماکاری گەنجانەوە کردیتیە هەڵبژێرەری ''جوانترین''یان، کردیتیە سووتەمەنیی خۆی بۆ ئەوەی پێی بەرهەم بێتەوە، بۆ ئەوەی زیاتر بمێنێتەوە، زیاتر چینایەتی دروست بکات، بەسەر جوان و ناشیریندا دابەشمان بکات.

خەمەکانی ئێمە، کۆژانەکانمان، کەوتنەگێژاوەکانمان گرنگن، ئەو ماف و ئازادییانەمان گرنگن کە هەرگیز نەمانبوون: ئەوەی کە هێشتا کچێک ''دەبێت'' حەوتی ئێوارە لە بەشەناوخۆییەکەی یان ماڵەوە بێت و هاوڕێ کوڕەکەی گەر نیوەشەویش بڕواتەوە کێشە نییە، ئەوەی کە هێشتا کچێک ناتوانێت دەستی یارەکەی بگرێت، ئەوەی کە هێشتا کچێک ڕووگیرە لە گرووپەکەیدا لە پاڵ هاوڕێ کوڕەکەی دابنیشێت، ئەوەی کە هێشتا کچێک باوک و برای دەیچەوسێننەوە، ئەوەی کە هێشتا کچێک لەبەر مێیینەبوونی ئازاد نییە، گرنگە کاری لە دژ بکرێت هاوڕێ شوان، نەک ئەوەی کامیان جوانترینە.

هێشتا چاوەڕوانیمان لێت هەیە، هێشتا دەمانەوێت دوایین کارەکانت ببینین، بەڵام ڕەنگە تامەزرۆ نەبین، بەهەڵپە نەبین بۆیان، وەک جاران تاسەمان بۆیان نەبێت، چونکە ئیتر لە زەینماندا چەسپیوە، نەستمان بیرمان دەخاتەوە، پێشگیرمانە دەکەین کە ساڵێک، ڕۆژێک لە ڕۆژان، لە چوارچێوەیەکی ئەکادیمی و مەعریفیدا، لە جێیەک کە سەرچاوەی وزە و هێزی گەنجانە و خوێندکارانەیە، لە زەمەنێکدا کە قەیرانەکان بینەقاقای کۆمەڵیان گرتبوو: سینەماکارە گەنجەکەمان، شوان عەتوف، ئەندامی ''لیژنەی هەڵبژاردنی شاجوانی زانکۆ و پەیمانگەکان'' بوو.