شاجوانە ناشیرینەکان: خوێندکاران مژدەمان لێ بێت، ئیتر ''کاریزما''مان هەیە!

هەرچەندە لەشکرگەلێک لە خوێندکاری نەخوێندەوار و نابەرپرسمان هەن، بەڵام هێشتا و سەرەڕای کەلاوەیی زانکۆ و پەیمانگەکان، خوێندکارگەلێک بوونیان هەیە، کە تێکۆشەرن، خەباتگێڕن، بەرەنگار و بە مانای وشە، گەنجن، خوێندکارن، سەرمایەی نیشتمانین. کەچی ئێوەی لە یەک کاتدا قوربانی و بەرهەمهێنەرەوەی سیستم، لەبری ئەوەی بێن توانا مادی و مەعنەوییەکانتان لە لایەنەکانی خوێندکاربوون و ئەوانەی پەیوەندییان بە تێکۆشان و خەباتگێڕان و بەرەنگاربوون هەیە سەرف بکەن، کاری بۆ بکەن، پنتێک لەو کەلاوەیەدا بناغە بکەن، بیکەنە نمایندە و وێنەی گشتیی خوێندکاران، کەچی دێن بە کۆمەڵێک پاساوی مەهزەلەئاسای وەک ئەوەی ''باڵوێزی خوێندکارانی زانکۆ و پەیمانگەکان'' هەبێت، کەسێک لەبەر ئەوەی ساڵۆنەکان ڕووکەشیان جوان کردووە دەکەیتە ''شاجوان'' و بانگەشەی ''کاریزمابوون''ی دەکەن.

بەهانەتان بۆ ئەوەی کە مەڕاسیمێکی لەم جۆرەتان ڕێک خستووە و نیازتانە بۆ ساڵانێک ڕێکخەرایەتیی بکەیت، لە کردەکەتان شەرمهێنەرترە: ''خوێندکار بۆ سیمینار یەت یان بۆ حەفلە؟ تەلەبە گوێ لە قسەی کتێب ئەگرێ یان کچێک کە شاجوانە؟ تۆ ئەبێ بەو جۆرە لە تەلەبە نزیک ببیتەوە کە تەلەبە ئەیەوێ.'' شۆک دەبین، سەرمان سووڕ دەمێنێ لەم جۆرە بیرکردنەوەیە، کە هیی ''خوێندکار''ە! سەرەڕای ئەوەی هەوڵ دەدرێت پەشیمان بکرێنەوە، واتان لێ بکرێت جارێکی تر ئەم پاساوانە نەهێننەوە، نەوەک ناو و دەستەواژەی ''خوێندکار'' بە خراپ بڕوات، کەچی سوورترن لەسەر ئەم ئامانجە کارتۆنییانەتان، لەسەر ئەم دیدگا فشەڵ و هەزەلییانەتان، بەوەی کە ''لەم وڵاتە میدیا هێندەی گرنگی بە شاجوان و ئەم جۆرە بابەتانە ئەدا، گرنگی بە چی تر ئەدا؟''

ئەو بەرهەمە ''جوان''انەی سیستم، ئەوانەی ڕووکەشیان بە یارمەتیی سووراو و سپیاوەکان جوان دەکەن و عەقڵ و مەعریفەی ئەتککراویان لە لایەن سیستم و زانکۆ و پەیمانگەکانەوە لەگۆڕ دەنێن، با هەر باڵوێز و کاریزمای ناشیرینیی ئێوە بن، با ئەوان پێشڕەوتان بن، ''داوا''ی مافەکانتانتان بۆ بکەن، نموونەی خەرمانی داڕزاوتان بن. کاریزمای ئێمە ئەو خوێندکارانەن کە تێکۆشەرن، خەباتگێڕن، بەرەنگار و خوێندکارن، گەنجن، بۆ ماف و ئازادییەکانیان پڕ بە گەروویان هاوار دەکەن و نەک ناهێڵن لەگۆڕ بنرێن، بەڵکو ناشهێڵن سیستم بیانکوژێت و بیانکاتە بەرهەمی خۆیان، ئەمانەن کاریزمای ئێمە. باڵوێزەکاشیان وا لە قلیاسان، لە ڕیزی بینای بەشەناوخۆییەکان، لەو جێیەی پڕە لە وزە و هێز، لە تووڕەییەکی پەنگخواردوو: BD1ی سووتاو.